Людміла Рублеўская

“Ночы на Плябанскіх млынах”

Мінск: “Мастацкая літаратура”

Пра кнігу:

У кнігу вядомай пісьменніцы Людмілы Рублеўскай увайшлі гатычны раман “Скокі смерці”, у якім журналістка Ганна Барэцкая і рэстаўратар Юрась Дамагурскі разгадваюць таямніцу сярэднявечных гадзіннікаў, аповесць “Ночы на Плябанскіх млынах”, дзе міфы і легенды Мінска пераплятаюцца ў запамінальную містычна-рамантычную карціну, цыкл “Старасвецкія міфы горада Б*”, што спалучае антычныя міфы і рэаліі старасвецкага беларускага мястэчка, а таксама апавяданні, у якіх дзейнічаюць і паўстанцы Каліноўскага і Касцюшкі, і нашы сучаснікі. Героі Людмілы Рублеўскай вырашаюць адвечныя праблемы выбару паміж годнасцю і бяспекай, каханнем і здрадай, захаваннем гістарычнай памяці і абыякавасцю. У кнізе ёсць і прыгоды, і містыка, і гумар, і псіхалагізм, і развагі над лёсам Беларушчыны.

Пра аўтара:

Людміла Рублеўская нарадзілася ў Мінску ў 1965 годзе. У 1986 годзе паступіла ў Літаратурны інстытут iмя Горкага ў Маскве на аддзяленне паэзіі, адкуль вярнулася праз год і перавялася на беларускае аддзяленне філфака БДУ. Працавала ў газеце “Наша слова”, часопісе “Першацвет”, тыднёвіку “Літаратура і мастацтва”. Кіруе суполкай маладых творцаў “Літаратурнае прадмесце”. Лаўрэат прэміі часопіса “Дзеяслоў” “Залаты апостраф” за паралельны раман “Золата забытых магілаў”, дзеянне ў якім адбываецца ў часы паўстання Кастуся Каліноўскага і ў нашым часе. Усяго ў яе выйшла амаль два дзясяткі кніг у розных жанрах — паэзія, проза, драматычныя творы, эсэ, крытыка, творы для дзяцей, сярод якіх кніга казак “Прыгоды мышкі Пік-Пік” — спроба стварэння сучаснай беларускай гарадской міфалогіі (выдадзеная ў Беларусі і Польшчы). Аўтар кніг прозы “Старасвецкія міфы горада Б*”(2002), “Сэрца мармуровага анёла” (2003), “Пярсцёнак апошняга імператара” (2006), кнігі казак для дзяцей “Карона на дне віра” (2008), зборніка гістарычных эсэ “Беседы о философах”(2006), кнігі краязнаўчых артыкулаў “Я — мінчанін” (2006, у перакладзе на рус. мову — 2007), зборніка архіўных даследаванняў па гісторыі беларускай літаратуры “Время и бремя архивов и имен” (2009) у суаўтарстве з гісторыкам В. Скалабанам. Аўтар шматлікіх паэтычных зборнікаў: “Крокі па старых лесвіцах”(1991), “Замак месячнага сяйва”(1992), “Над замкавай вежай”(2003), “Балаган”(2000), “Рыцарскія хронікі”(2002), “Шыпшына для пані” (2008) і др., а таксама аўтар драматычных паэм і п’ес, некаторыя з якіх былі пастаўленыя на тэатральных сцэнах. Па драматычнай паэме “Апошняя з Алелькавічаў” зняты аднайменны відэафільм ( БТ, 1999). Дакументальная п’еса “Людвіка і Фабіян” у суаўтарстве з гісторыкам В. Скалабанам выйшла асобнай кнігай (2007). Выступае ў друку як крытык і літаратуразнаўца. Аўтар даследавання “Беларускі міф і яго трансфармацыя ў маладой паэзіі 10-20-х i 80-90-х гг. ХХ ст.”. Сябар Саюза беларускіх пісьменнікаў.

Паказаць фрагмент кнiгi

Прэмiя Гедройца

Людміла Рублеўская

“Ночы на Плябанскіх млынах”

Пра кнігу:

Пра аўтара:

Журы